26/10/2025 Watu watatu wa dini ya Kikristo, akiwemo mchungaji mmoja, wamekamatwa kaskazini mwa India katika jimbo la Uttar Pradesh. Wamekamatwa kwa madai kwamba walikuwa wanajaribu kuwabadili watu wa dini ya Kihindu kuwa Wakristo kwa kutumia “vishawishi” au ahadi fulani — jambo ambalo linapigwa marufuku chini ya sheria ya kupinga uongofu wa dini (anti-conversion law).
Kulingana na ripoti ya Press Trust of India (PTI), waliokamatwa ni:
- Mchungaji Sumit Masey,
- Amit Masey (anajulikana pia kama Akshay Masey),
- na mwanamke mmoja aitwaye Sarita.
Mtu wa nne anayetuhumiwa, Satyapal, bado hajapatikana.
Kukamatwa kwao kulifanyika chini ya vifungu vya Sheria ya Kuzuia Ubadilishaji Dini Usio Halali ya Uttar Pradesh ya mwaka 2021 (Uttar Pradesh Prohibition of Unlawful Conversion of Religion Act, 2021), ambayo maarufu inajulikana kama sheria ya kupinga uongofu wa dini (anti-conversion law).
Sheria hii inapiga marufuku mtu yeyote kubadili dini kwa kutumia ushawishi wa aina yoyote.
Kesi hiyo ilianza baada ya malalamiko yaliyotolewa na wakazi wa eneo hilo, wanaoitwa Rishabh Thakur na Nirdosh Rathore. Walisema kwamba watu hao waliokuwa wanahusishwa na umisheni wa Kikristo walikuwa wamepanga nyumba katika eneo la Super City, jijini Bareilly, ambapo walidaiwa kuwaalika wanawake na watoto wa Kihindu kwenye mikutano ya maombi na ibada, lakini kwa siri walikuwa wanajaribu kuwabadilisha dini.
Adhabu ya kosa:
⚖️ Kosa la kawaida la ubadilishaji wa dini usio halali
- Adhabu: Kifungo cha kati ya mwaka 1 hadi miaka 5,
- Faini: Kiasi kisichopungua rupia 15,000 (takriban zaidi ya laki 2 Tsh).
⚖️ Iwapo mtu aliyegeuzwa dini ni mwanamke, mtoto, au mtu wa jamii ya SC/ST (Scheduled Castes or Tribes)
- Adhabu: Kifungo cha kati ya miaka 2 hadi 10,
- Faini: Kiasi kisichopungua rupia 25,000.
⚖️ Iwapo ubadilishaji wa dini unahusisha kundi kubwa la watu (mass conversion)
- Adhabu: Kifungo cha kati ya miaka 3 hadi 10,
- Faini: Kiasi kisichopungua rupia 50,000.
⚖️ Aidha, mtu yeyote anayetoa misaada, makazi, au fedha kusaidia mchakato wa ubadilishaji haramu anaweza pia kushitakiwa chini ya vifungu hivyo.
Sheria hii pia ina kipengele kinachotaka mtu anayetaka kubadilisha dini atolee taarifa kwa serikali miezi miwili kabla ya kubadilisha dini. Asiyefanya hivyo anaweza pia kuadhibiwa.
BIBLIA INATUAMBIA NINI?
Bado shetani anaipiga vita injili na watumishi wa MUNGU,
Wakati wakristo wa mahali fulani wanatoa maisha yao na kukubali vifungo kwaajili ya Injili, Wakristo wa mahali pengine wamesimama pasipo mchango wowote wa injili.
Yohana 15:19 “Kama mngekuwa wa ulimwengu, ulimwengu ungewapenda walio wake; lakini kwa kuwa ninyi
si wa ulimwengu, bali mimi naliwachagua katika ulimwengu, kwa sababu hiyo ulimwengu
huwachukia.20 Likumbukeni lile neno nililowaambia, Mtumwa si mkubwa kuliko bwana wake. Ikiwa waliniudhi
mimi, watawaudhi ninyi; ikiwa walilishika neno langu watalishika na lenu.
